ရန်ကုန်က ၈ လေးလုံး အမှတ်တရ သမိုင်းပြတိုက်

 

၈ လေးလုံး အမှတ်တရပြတိုက်ကို လာရောက်ကြည့်ရှုကြသူများ။

တနိုင်ငံလုံး အုံကြွခဲ့သည့် ၈ လေးလုံးအရေးတော်ပုံသည် ပြီးခဲ့သည့် သြဂုတ်လ ၈ ရက်နေ့တွင် ၂၇ နှစ် ပြည့်ခဲ့ပြီ ဖြစ်သည်။ ထိုလှုပ်ရှားမှုတွင် ပါဝင်ခဲ့သူအချို့သည် ယခုနှစ် သြဂုတ်လ ၈ ရက်နေ့တွင် ရန်ကုန် မြို့တွင် ပြန်လည် စုဝေးခဲ့ကြသည်။ သူတို့သည် ၈ လေးလုံး ၂၇ နှစ်မြောက် နှစ်ပတ်လည် အခမ်းအနား ကျင်းပရန် စုဝေးခဲ့ကြပြီး အရေးတော်ပုံအမှတ်တရ ယာယီသမိုင်းပြတိုက်တခုကို ဖွင့်လှစ်ခဲ့ကြသည်။
ရန်ကုန်မြို့ သင်္ကန်းကျွန်းမြို့နယ် သုမင်္ဂလာလမ်းတွင် ဖွင့်လှစ်ထားသော ၈၈ မျိုးဆက် ငြိမ်းချမ်း ရေးနှင့် ပွင့်လင်း လူ့အဖွဲ့အစည်း ရုံး၏ နှစ်ထပ် ခန်းမတွင် သြဂုတ် ၈ ရက်နေ့မှ သီတင်း ၆ ပတ်အကြာ စက်တင်ဘာ ၁၈ ရက်နေ့ စစ်တပ်မှ အာဏာသိမ်းသည့် နေ့အထိ မှတ်တမ်း တင်ထားသည့် ဓာတ်ပုံများကို ပြသထားပါသည်။ ပြတိုက် ရည်ရွယ်ချက်မှာ သမိုင်းကို မှတ်တမ်းတင်ရန်နှင့် မျိုးဆက်သစ်များအား တိုင်းပြည် သမိုင်း၏ အရေးပါသည့် အဖြစ် အပျက်များကို သိရှိနိုင်ရန် နေရာတနေရာ ဖန်တီးပေးခြင်း ဖြစ်ကြောင်း ပြတိုက်တာဝန်ခံ ဦးအောင်မော် က ပြောသည်။
“အခုအချိန်မှာတော့ ယာယီပဲရှိပါသေးတယ်။ ဒါပေမယ့် ကျနော်တို့ခန်းမအတွက် တရားဝင်နေရာရဖို့အတွက် ကြိုးစားနေပါတယ်။ အထူးသဖြင့် လူငယ်တွေကို မြန်မာနိုင်ငံရဲ့ သမိုင်းအစစ်အမှန်ကို ပြသဖို့ အတွက်ပါ” ဟု ဦးအောင်မော်က ပြောသည်။
ပြတိုက်ဖွင့်ပွဲနေ့တွင် ဧရာဝတီဓာတ်ပုံသတင်းထောက် ဂျေပိုင်က မှတ်တမ်းတင် ရိုက်ကူးခဲ့သည်။